Oug um oug, tand um tand Gesjreve door Jef Franssen
In aw Gesjrifte is gesjreve,
oug um oug tand um tand
In de Goddeleke Wereld de Wereld vaan de Machte,
de Wereld vaan Slevenier, is gein inkel vergeve
In dee Wereld heers " 't Elkander "
't Minsekeend vaan dees Eerd ging iers ziene naoste,
plant bies stein en zier denende ziel mins, vergete
toen kleinere
en in d'n tied vaan noe vermaore
Veur de dwingende wèl vaan de ziel mins in de zuchte
mós edere naoste altied buige
D'n tied waor de stèlle getuige
De Wereld vaan de Machte zal de mins noe d'n oorlog verklaore
Niks zal dee Wereld de mins bespaore
De nuie tied zalle ze veur plant bies stein en denende ziel mins bewaore
Aon de naoste heet de mins noets mie gedach
Vaan zien gesjiedenis neet wèlle liere
Allein de priester in de mins wouw heer nog veriere
De zuchte höbbe väöle gemerk
Toen 't nog kós, toch 't tij neet wèlle kiere
Daan kreig de mins te make mèt de Wèl vaan drei groete Machte
Vrijheid, Zelfstandegheid, Sjoenegheid
Hunne vraak liet neet lang mie op ziech wachte
Oug um oug tand um tand, de Mathematische Wet vaan Vergelding,
deit zoemetein zien oonverbiddelek werk
Euver 't koed woort door de mins ummertouw
'n groete, zwoer deke gelag
Dèks woort gezag
me moot koed mèt good vergelle
In 't Ierste en ouch in 't Twiede Oordeil euver dees Eerd
zal de mins 't tegendeil ervare
De Wereld vaan de Machte, de Goddeleke Wereld,
de Wereld vaan de Oonziechbare de Oongriepbare,
vèlt in d'n tied vaan noe 't Ierste Oordeil
Oug um oug tand um tand
Vergelding geld in edere sjöpping boe De Wèt " 't Elkander "
nog neet is gevoonde
Boe 'n sjöpping nog altied aon veurtsjreidende tied is geboonde
Koed mèt good vergelle,
dat oordeil zal de Wereld vaan de Machte noets oetspreke
In de aw Gesjrifte is 't tegendeil te leze
De mins zal de mach euver dees Eerd hielemaol verlere
Zier väöle zien aon de zuchte bezweke
Väöle wouwe allein mer de leuge preke
Wie de mins ziene naoste wèlt rake, zoe weurt ouch heer geraak
Zien dinke, doen en handele de oerzaak
Al zier lang geleie verloor dees Eerd door de mins edere ballans
Al zier lang geleie verloor zie edere glans
De wèl vaan de mins euver dees planeet
maak in d'n nuie tied noets mie 'ne kans
De Mathematische Wet vaan Vergelding
oug um oug tand um tand,
die Wet is zier snel neet mie irrelevant
't Is de mins dee dat veroerzaak heet
Dees Eerd steit allang in brand
Zien hegemonie euver dees Eerd
zal veur altied in 'ne deepe aofgrond valle
Door 't kleinste bieske weurt heer aongevalle
Väöl land geit in de deepte vaan de oceane verzinke
De mins verdwijnt in zier groete aontalle
Die versjrikkinge kin geine mins ziech indinke
Veur de denende ziel mins op zeuk nao " 't Elkander ",
allein veur dee mins is op dees Eerd nog 'n plaots vacant
Deze ierste tied weurt aofgeslote
De Wereld vaan de Machte mós
veur de Mathematische Wet vaan Vergelding beslete 't Waor 'n mote !
Oug um oug tand um tand
Oet de Vergelding vaan de Wereld vaan de Machte
zal De Verlossing oontstoon
Plant bies stein en euvergebleve mins
verlos vaan väöl ziele mins in de zuchte,
verlos vaan eder dwinge en gehoerzame
Op dees planeet Eerd zal d'n euvergebleve mins
nao echte woere vrijheid, zelfstandegheid en sjoenegheid mote euvergoon
De weeg nao Ierlekheid zal heer mote insloon
Zien lèste exame
